Лондоннинг "Челси" клуби Бельгиянинг "Андерлехт" клуби билан ҳужумчи Ромела Лукакуни сотиб олиш борасида келишувга эриша олди.
Энди Бельгия терма жамоасининг 18 ёшли ҳужумчиси лондонликлар сафида тиббий кўрикдан ўтгандан сўнг, шахсий шартнома борасида музокара ўтказиши талаб қилинади.
"Биз Ромелани қўйиб юборишимиз керак. Ушбу трансфер футболчи учун ҳам, клубимиз учун ҳам манфаатли келишувдир", - дейди "Андерлехт" клуби бош директори Херман ван Хольсбек ВВСга берган интервьюси вақтида.
Эслатиб ўтамиз, "Челси" клуби Лукакуни сотиб олиш борасида ёзги трансфер мавсуми бошлангани ҳамоно музокара бошлаган эди. Шунга қарамасдан, лондонликлар бош мураббийи Андре Виллаш-Боаш ўз вақтида Лукакунинг "Челси"га керак эмаслигини ҳам таъкидлаб ўтганди.
Лукаку бошланиб кетган Бельгия чемпионатининг икки учрашувида иштирок этган бўлиб, иккита гол киритишга ҳам улгурган.
