Лондоннинг "Арсенал" клуби ярим ҳимоячиси Самир Насрининг айтишича, унинг учун пулдан кўра, турли мусобақалардаги ғалабаларнинг аҳамияти каттароқ экан.
"Пул мендаги иштиёқ учун энг асосий сабабчи бўлмай қўйган. Ҳар доим футбол нуқтаи назаридан келиб чиқиб қарор қабул қиламан. Менга ёқмайдиган футбол намойиш этадиган жамоада яхши шартнома эвазига бўлса ҳам ўйнашни хоҳламайман.
Мен аллақачон кўп пул ишлаб улгурганман. Энди менинг олдимга қўйган энг асосий мақсадим — яхши спорт фаолиятини олиб бориш ва совринлар ютиб олиш. Айнан шу нарса ҳаммасидан ҳам муҳим. Совринларсиз қолган футболчи ҳеч қачон "Олтин тўп"ни қўлга кирита олмайди.
Англияга айнан совринлар ютиб олиш учун келган эдим, ахир шу вақтга қадар ҳеч нарса ютмаганман ва ғалабаларга жуда чанқоқман. Бутун жамоамиз билан бирга бошим узра Кубокни кўтармоқчиман. Спортнинг бизга тегишли турида ҳам, совринлар энг муҳим нарсадир", - дейди Насри.
Эслатиб ўтамиз, 23 ёшли футболчининг "тўпчилар" билан тузган шартномаси келгуси йилнинг ёзида ниҳоясига етади. Аммо, клуб ва футболчи ўртасида янги шартнома борасида келишувга эришишнинг имкони бўлмаяпти. Турли хил оммавий ахборот воситалари томонидан хабар берилишича, Самир Насри билан "Манчестер Юнайтед", "Челси", "Интер" ва "Манчестер Сити" клублари қизиқмоқдалар.
