Англиядаги тартибсизликлар туфайли бир қанча спорт мусобақаларининг ўтказилиши сўроқ остида қолди. Шу сабабли Англия премьер лигасининг биринчи тури ҳам ўтказилмаслиги мумкин.
Мамлакат футбол раҳбарлари 1-турнинг бир қанча ўйинларини муддатини ўзгартириш ҳақида бош қотиришмоқда. Биринчи навбатда Лондондаги учрашувларни. Шанба куни бу ерда 1-турнинг уч ўйини ўтказилиши керак: «Тоттенхэм» - «Эвертон», «Фулхэм» - «Астон Вилла» ва «Куинс Парк Рейнжерс» - «Болтон».
Эслатиб ўтамиз, Лондондаги тартибсизликлар ўтган пайшанба куни Тоттенхэм туманида яшовчи 29 ёшли Майк Дагганнинг полиция томонидан отиб қўйилганидан кейин бошланганди. Шундан сўнг Майкнинг дўстлари кўчаларга чиқишди. Улар ва полиция ўртасида тўқнашув юзага келди ва тартибсизлик бошланди. Улар туманнинг турли кўчаларидаги магазинлар ойналарини синдиришди, полициянинг иккита машинасини ва 3 қаватли бинони ёқиб юборишди. Полиция шанба куни бу тартибсизликка чек қўйганди, лекин улар ҳар куни янгидан бошланяпти. Ҳозир худди шундай акциялар Англиянинг бошқа шаҳарларида ҳам бошланган.