Испания чемпионатида етакчилик қилиб келаётган Каталониянинг «Барселона» жамоаси куни кеча бўлиб ўтган 28-тур ўйинларида очко йўқотишга мажбур бўлди. Каталонияликлар Андалусиянинг "Севилья" клубига қарши кечган учрашувда дуранг натижа билан қаноатландилар.
Аввалига барчаси "Барселона" учун яхши бошланган эди. Ҳужумчи Боян Кркич ҳисобни очиб, жамоасини олдинга олиб чиққанди. Бироқ, орадан бироз вақт ўтгач, рақиб жамоа вакили Хесус Навас жавоб тўпини киритишга муваффақ бўлди. Шундан сўнг, томонлар ҳарчанд уринган бўлсалар-да, ҳисобни ўзгартиришнинг уддасидан чиқа олмадилар.
Каталонияликлар очко йўқотган бўлсалар-да, Испания чемпионатидаги етакчилик мавқеларини сақлаб қолдилар. Бироқ, энди иккинчи ўринда бораётган Мадриднинг "Реал" клуби билан ўртадаги фарқ беш очкога қадар қисқарди. Агарда, олдинда класико баҳси турганини назарда тутадиган бўлсак, Ла лига ўйинларига бўлган қизиқиш яна-да ошишини кутсак бўлади.
Севилья – Барселона – 1:1 (0:1, 1:0)
Голлар: 0:1 – Боян (30), 1:1 – Навас (49).
СЕВИЛЬЯ: Хави Варас, М. Касерес, Фасио, Алексис, Ф. Наварро, Медель, Зокора (Кануте, 46), Навас, Ракитич, Капель (Перотти, 72), Негредо (Ромарик, 88).
БАРСЕЛОНА: Вальдес, Дани Алвес, Пике, Абидаль, Адриано (Максвелл, 75), Хави, Бускетс, Иньеста, Педро (Боян, 14), Месси, Вилья (С. Кейта, 85).
Огоҳлантириш: М. Касерес (25), Зокора (28), Адриано (40), Хави (62), Медель (62), Ф. Наварро (63), Капель (69).
13 март. «Рамон Санчес Писхуан», 01.00.
Ҳакам: Мигель Анхель Перес Ласа.
|
