Яқинда Самарқандда бўлиб ўтган янги мавсумга бағишланган футбол анжуманида вилоят ҳокими Зоир Мирзаев иштирок этаркан, «Динамо» ўйингоҳининг қайта қурилиши учун ажратилган маблағ миқдорини эълон қилди.
«Бугунги кунда мамлакатимизда футболга берилаётган эътибор сиёсат даражасида десам ҳеч қандай муболаға бўлмайди. Сўзим тасдиғи сифатида сўнгги йилларда футболни ривожлантириш бўйича муҳтарам президентимиз томонидан қабул қилинаётган қатор қарорларни айтишим мумкин. Хусусан, шу йилнинг 19 январида қабул қилинган «2011-2013 йилларда республикада футболни ривожлантириш ва моддий-техник базасини мустаҳкамлаш бўйича қўшимча чора-тадбирлар» қарори футболимизнинг ривожига янада катта туртки бўлиши шубҳасиз» - дейди вилоят раҳбари ўз чиқишида.
Зоир Мирзаевнинг сўзларига кўра, қарорга мувофиқ бугунга келиб «Динамо» стадиони лойиҳаси ишлаб чиқилган ва стадион реконструкцияси бошлаб юборилган.
«Ҳозирда «Динамо» ўйингоҳида қурилиш-таъмирлаш ишлари бошлаб юборилган. Биз сентябрь ойига қадар барча ишларни якунлаб, стадионни тайёр ҳолатга келтиришимиз шарт. Стадион реконструкцияси учун 4 миллиард сўм маблағ ажратдик. Шунингдек, Пастдарғом туманида «Динамо» футбол клуби қошидаги болалар-ўсмирлар футбол мактаби ҳам тўлиқ ишга туширилмоқда», - дея таъкидлади Самарқанд вилояти ҳокими. Маърузада айтилишича, жорий йилда вилоят ички биринчилигида ва мамлакат чемпионатларида иштирок этаётган вилоят жамоалари ҳам молиявий қўллаб-қувватланади.
Анжуман якунида Самарқанд вилоят ҳокими Зоир Мирзаев йиғилиш қатнашчиларига янги футбол мавсумида зафарлар тилаб, барча ўз ишига чин дилдан ёндашиб, ягона мақсад - футболимиз ривожига ҳисса қўшишни ва миллионлаб мухлисларни хурсанд этиш учун бор куч ва ғайратимизни ишга солиш лозимлигини таъкидлаб ўтди.
