Бундеслига 2010/2011 мавсуми қишки танаффусдан қайтиб, орада иккита тур ўйинларини ўтказган бўлса-да, трансфер бозори ҳали ёпилгани йўқ. Жамоалар 31 январга қадар ўйинчи сотишлари ва сотиб олишлари мумкин. Шу туфайли ҳам, январнинг сўнгги кунларида Бундеслига жамоалари ўз сафларини (айрим ҳолларда эса ҳамёнларини) кучайтириб олиш учун қизғин ҳаракат қилишмоқда.
Қуйида Сизни Бундеслигада шу кунгача қайд этилган қишки трансфер натижаларининг баъзилари билан таништириб ўтаман.
БАВАРИЯ: жамоа бу мавсумдаги қишки трансферлар учун ҳозирча 14 миллион евро сарфлади. 17 миллион еврога Луис Густаво „Ҳоффенҳайм"дан сотиб олинди ҳамда Мартин Демикелис 3 миллион евро эвазига Мюнхенни Испаниянинг „Малага" клуби томон тарк этди. Марк ван Боммел („Милан"га) ва Эдсон Брафҳайд („Ҳоффенҳайм"га) „Бавария"ни трансфер суммасисиз тарк этишди. Давид Алаба „Ҳоффенҳайм"га ижарага берилди.
ШАЛЬКЕ-04: Эрик Йендрисек 700 минг еврога „Фрайбург"га, Иван Ракитич эса 2,5 миллион еврога "Севиля"га сотилди ва Жермайн Жонс „Блэкбурн"га ижарага берилди. Ижарага берилган Торе Регинуссен (Италиянинг „Лечче" клубидан) ва Авелар Данило (Лвовнинг „Карпати" клубидан) жамоага қайтиб келишди.
БРЕМЕН: Ҳуго Алмейдани „Бешиктош"га 2 миллион еврога сотган жамоа Швециянинг „Элфсборг" клубидан Дэнни Авдични 2,2 миллион еврога сотиб олди.
БОРУССИЯ-Д: 2-Бундеслига вакили „1860-Мюнхен" клубидан Моритц Лайтнер 800 минг еврога сотиб олинди ва „Аугсбург"га ижарага бериб юборилди.
ВОЛФСБУРГ: жамоа қишки трансферда 36,3 миллион евро фойда кўрди. Бундеслига тарихидаги энг қиммат трансферни амалга ошириб, ўз тўпурари Эдин Жекони 37 миллион евро эвазига Англиянинг „Манчестер Сити" клубига сотган жамоа „Монако"дан Диумерчи Мбоканини 1 миллион еврога сотиб олди. Андреа Барзагли жамоани 300 минг евро эвазига „Ювентус" томонга тарк этди.
ҲОФФЕНҲАЙМ: сўнгги вақтларда ўйини умуман қовушмаётган, бунинг устига „Коттбус"га қарши мағлубиятдан кейин мамлакат кубоги баҳсларидан чиқиб кетган жамоа Бразилиянинг „Томбензе" клубидан ярим ҳимоячи Роберто Фирминони 4 миллион ва „Ливерпул" клубидан Рьян Бабелни 7 миллион еврога сотиб олди. 17 миллион еврога „Бавария"га сотилган Густаводан ташқари, 100 минг евро эвазига Кристиан Айхнер жамоани „Кёльн" сари тарк этди. Бу трансферлардан ташқари, жамоада мураббийлар таркибида ҳам ўзгариш содир бўлди. „Ҳоффенҳайм"да жамоани ҳозирги даражага олиб чиққан мураббий Ралф Рангник жамоа мутасаддилари билан чиқишолмай қолганлиги туфайли ишдан олиниб, унинг ўрнига Марко Пеццаюоли мураббий этиб тайинланди.
