Хабарингиз бор, Англиянинг «Тоттенхэм» клуби ўз тарихида биринчи марта Чемпионлар Лигаси чорак финалига чиқди.

Инглиз жамоасининг россиялик ҳужумчиси Роман Павлюченко «СЭ» мухбири билан суҳбатда «Милан»га қарши баҳс таассуротларини баён этди.
- Айни дамда ёқимли ҳиссиётлар билан сармаст бўлсангиз керак?

- Натижадан - албатта. Лекин умумий оладиган бўлсак, ўйинда ҳаракатларимиз унчалик қовушмади. Унинг асосий вақти бизнинг ҳудудимизда, «Милан» назорати остида ўтди. Худога шукр, хавфли вазиятлар голга айланмади - ҳимоямиз диққат билан ўйнади. Очиғи, старт ҳуштагидан олдин учрашув бошқача кўриниш олиши мумкинлигини тахмин қилгандик.

- Италияликларни 3-4 тўп фарқи билан ютишни кўзлаганмидинглар?

- Йўқ, албатта, бунчалик катта кетмагандик. Аммо биринчи ўйинни назарда тутиб, бошқача футбол кутиш мумкин эди. Қисқаси,яна бир марта ютишни хоҳлагандик. Айнан менда бунга тўлиқ ишонч бор эди - нафақат итальян клуби тўсиғидан ўтиш, балки уйда ҳам ғалаба қозонишга.

- Хўш, нимада муаммо туғилди? «Милан» кучлилик қилдими ёки сизлар ўз имкониятларингиз даражасидан паст ўйнадинглар?

- «Милан» ўз майдонидагидан тамоман бошқача ўйин намойиш этди. Лекин асосий сабаб бунда эмас. Энг катта муаммо - босим кучли бўлди. Ягона хато қимматга тушиши мумкин эди. Минимум даражада устунликни сақлаб қолишга эришиш осон эмас. Захира ўриндиғида ўйинни кузатишнинг иложи йўқ эди - майдонга тушиб, жамоага ёрдам беришни хоҳлайсан киши.

- Ниҳоят, сизни майдонга туширганларидан кейин ўзингизни енгил ҳис қилдингизми?

- Унчалик эмас - ўйин охирларида очиқчасига ҳимояга ётиб олдик. Бу вазиятда «овертайм»га тушиб қолиш аламли бўларди. Ўйиндан олдин «Милан»нинг 2та гол уролмаслигига негадир ишончимиз комил эди, лекин биттани кутиш мумкин ҳар доим. Бу ҳолатдан чиқиб кетиш осон бўлмади. Ўз ҳаракатларимга келсак, икки марта тўпга эга чиқдим, уч марта «офсайд»га тушдим. Ҳаммаси шу...

- Икки ўйиндан иборат қарама-қаршиликнинг якуни адолатли бўлдими?

- Сўзсиз. Биз курашни давом эттириш имкониятига эга бўлган эканмиз, демак, шунга яраша хизмат қилдик. «Милан» эса биринчи ўйиндаёқ имкониятни бой берди...

- Кейинги босқич қуръасидан олдин нимани ният қиляпсиз?

- Кучсиз рақиблар қолмади, ҳисоб. Муҳими, навбатдаги босқичда «Барселона»га қарши тушмасак бўлгани. Бу жамоанинг «Арсенал» билан ўйинини кўрдим - «машина»нинг ўзгинаси. Каталония клуби - ЧЛнинг реал фаворити.

- Айтайлик, айнан «Барса» тўғри келса, шу заҳоти қўл кўтарасизларми?